أجمل ماسكات للوجه تفتيح وترطيب ونضارة

أهلين بنات

حبيت اليوم أكلمكم عن أفضل ماسكات جربتها وأعجبتني نتيجتها وحبيت أفيدكم بها، طبعا بصراحة أنا في البداية من فترة طويلة كنت أنظر للماسكات على أنها لحظية أو بالأصح مالها ذاك الفائدة يعني كنت مو مقتنعة فيها مرة، لكن في يوم قلت أجرب وأشوف ومن ضمن تجاربي انبهرت بثلاث ماسكات للوجه منهم اثنين ماسكات طبيعية للوجه، و واحد جاهز يعتبر خيار ممتاز كماسك جاهز وسهل وسريع، بس أحب أنبهكم بنات قبل تستخدمون أي ماسك أول شيء إذا بشرتكم فيها مشاكل جلدية أو حبوب أو متهيجة لأي سبب فلازم في الأول تعالجونها، وثاني شيء قبل ما تجربون أي شيء جربوا على جزء من البشرة إذا ما لاحظتوا احمرار أو حبوب أو أي علامات تحسس بإمكانكم وقتها تحطون على كامل الوجه.

الماسكات نوعين نوع اللي أحنا نسويه في البيت بمكونات طبيعية وهو أنواعه كثيرة بإمكاننا نطبقها حسب اللي يناسبنا وحسب هدفنا من الماسك إذا هدفنا ترطيب فبإمكاننا ندخل الزيوت أو العسل ضمن المكونات، وإذا هدفنا تفتيح ندخل الخيار مثلا، وإذا هدفنا توحيد وتقشير فالقهوة خيار ممتاز وهكذا، حسب غرضنا نختار الماسك والأهم يناسب بشرتنا لأن مثلا الليمون ممتاز جدا بشهادة اللي جربوه بس أنا ما يناسبني فمارح أنصح به لأني ما جربته، فعلشان كذا جربوا على جزء من بشرتكم إلى أن توصلون للي يناسبكم، الماسكات اللي بكتبها الحين لكم باعتقادي تناسب الكل لأن بشرتي حساسة ومعرضة للأكزيما والحمدلله ناسبتني ففي الغالب راح تناسب الأغلب وكثير أعرفهم نصحتهم فيها وجربوها وأضافوها لقائمة مفضلاتهم، فجدا أنصحكم تجربونها سهلة وبسيطة ومكوناتها قليلة ومتأكدة بإذن الله راح تعجبكم.

أما النوع الثاني من الماسكات اللي هو الجاهزة فيه اللي تجي بشكل سائل في علبة أو في أكياس وفي نوع تجي بشكل قناع ورقي، أنا جربت كذا نوع وبكتب لكم أفضل واحد جربته إلى الآن ولقيت نتيجة حلوة وممتاز كماسك لترطيب الوجه وبوضح لكم وين ممكن تلقونه، ونبدأ:

أولا/ الماسكات الطبيعية

1- ماسك القهوة

أروع ماسك جربته ونصحت فيه كثير لأنه بتلاحظين من أول مرة إن بشرتك فيها حيوية ونضارة، ميزته أنه سهل ومكوناته غالبا متوفرة وأيضا يعتبر قناع وصنفرة بنفس الوقت، لاحظت من استخدامه أنه يخفف مع الاستمرار لون البقع الداكن مثل التصبغات يبدأ يفتحها ويسبب توحيد للون البشرة، فيعتبر هذا الماسك جميل جدا ويعطي نضارة للبشرة، لكن مهم جدا الاستمرارعلشان تلاقين نتيجة ترضيك، مكوناته قهوة تكون من النوع الخفيف مو المركز جربوا على يدينكم مع شوي ماء لأن بعضها تترك لون أصفر على الجلد فاستخدموا الخفيفة وتكون سادة بدون نكهات، بالإضافة للقهوة المكون الثاني هو موية ورد وشوي حليب سائل أو حليب بودرة اخلطي إلى أن تحصلي على قوام متجانس ومتوسط ونحطه على بشرة نظيفة ونتركه 20 دقيقة ثم بعدها وأنتي تشطفينه بللي يدك بالماء وحركي بشكل دائري مثل كأنك تسوين صنفرة ثم اشطفيه وغسلي بعدها بالغسول ثم شوي اسكينول في قطنة ونمرره على البشرة حتى نتأكد أننا أزلنا الماسك تماما ونغسل الوجه بعد الاسكينول بالماء ثم نرطب، خطوات بسيطة واستمتعي ببشرة مشرقة ونضرة.

2- ماسك الشاي الأخضر

ماسك رائع مكوناته بسيطة وقليلة لكنه مفيد جدا للبشرة، مكون من شاي أخضر و زبادي بكميات متساوية إلى أن تحصلين على قوام متوسط ونحطه على بشرة نظيفة 15 دقيقة ثم تشطفينه بالماء وسوي صنفرة بحركة دائرية بلطف وأنتي تشطفينه ثم مرري ماء ورد في قطنة كتونر ثم إذا جف رطبي، ممتاز جدا ومن أول مرة بتلاحظين نضارة.

ثانيا/ الماسكات الجاهزة

1- ماسك الأرز من ذا فيس شوب

فيه أنواع من ماسكات ذا فيس شوب بنكهات مختلفة كان أول تجربة لي من ماسكاتهم واخترت الأرز، أعجبني جدا حلو كماسك ترطيب للوجه ويستمر ترطيبه تقريبا إلى ثمان ساعات كذا، خيار جميل إذا مثلا عندك مناسبة وحبيتي شيء سريع وسهل ومفعوله جميل يعتبر ورقي فسهل الاستخدام، وحلو أيضا كتنويع أو في السفر أو يوم حبيتي تدلعين نفسك يعتبر خيار ممتاز وسهل وسريع، تلقونه في محلات ذا فيس شوب ولهم فروع كثيرة، وأيضا في سنتربوينت أون لاين لقيتهم ما أدري إذا متواجدة في الفروع أو فقط أون لاين، لأن من فترة قريبة لقيت منتجات ذا فيس شوب في تطبيق سنتربوينت إذا حابين تطلبونهم.

هذه كانت أكثر ماسكات أعجبتني بس مهم جدا تستمرون عليها حتى تلاقون نتيجة حلوة هذا بالإضافة إلى عنايتكم اليومية للبشرة من غسول و تونر ومرطب، وعناية أسبوعية تقشير خفيف وعناية بين فترة وفترة كجلسة تنظيف عميق، حبيت أفيدكم بتجاربي، جربوا الماسكات وقولوا لي رأيكم و إذا سبق وجربتوها برضوة قولوا لي، و إذا عندكم ماسكات حلوة تنصحوني بها اكتبوا لي في التعليقات.

اتمنى إنكم استمتعتوا معي وأفدتكم.

وإلى اللقاء في تدوينات أخرى بإذن الله