أسهل طريقة للعناية بالقدمين

السلام عليكم ورحمة الله وبركاته

أهلين بنات 

أسعد الله أوقاتكم بكل خير 

جايتكم اليوم بتدوينة جمالية كلنا البنات تهمنا وبالذات أننا داخلين على فصل الصيف والصنادل والشباشب فكلنا تهمنا أنه أقدامنا تكون ناعمة و وردية ولونها متوحد، فحبيت أفيدكم بمنتجات عناية جربتها وأعجبتني كثير نتيجتها وسريعة نوعا ما وسهلة ومع الاستمرار كروتين يومي بتلاحظون نتيجة تسعدكم.

أنا قد سبق وكلمتكم في تدوينة سابقة وقلت أنه ما أحب أجرب كثير لأني إذا ارتحت على منتج أثبت عليه فترة ونادرا ما أغير كثير وأجرب كثير، لكن بين فترة وفترة أحب أجرب من منتجات العناية بالبشرة بشكل عام لأن ممكن فيه شيء حلو ويفوتني ههههه، بكلمكم اليوم عن منتجات العناية بالأقدام ونبدأ:

1- محك القدم

هذا المحك أخذته من زمان من ماركة شول تحصلونه في الصيدليات معروفة هذه الشركة فيها منتجات كثير للأقدام، المحكات أو المبرد البعض يسميه جربت كثير إلى أن جربت هذا وما عاد غيرته وثبتت عليه، جدا جميل أنصحكم فيه بنات سهل ونتيجته حلوة وله فترة معي وباقي ممتاز، طريقتي استخدمه وأقدامي جافة يمكن الأغلب لازم مبلولة وكل الطرق اللي قد شفتها كذا، لكن مرتاحة مع هذه الطريقة ونتيجتها جميلة والأهم ناسبتني، فبعد ما أحكها أغسلها بالماء وجل الاستحمام أو صابونة معينة أخصصها لها مرطبة وليفة القفاز خفيفة ولطيفة على الأقدام ثم أجففها وأرطبها وألبس جواربي وأحصلي على أقدام ناعمة و وردية.

2-كريم هيل ماجيك من فليكستول

قصة هذا الكريم معي عجيبة، السالفة أنه في يوم من الأيام قصرت في حق قدماي قليلا فمن الطبيعي أن تجف ولكن الطامة أن الجفاف صادف فصل الشتاء ولكن أخياتي تخيل المنظر، جفاف شديد إلى أصبحت شهباء اللون، وين طريق الصيدلية بس وسألت عن أفضل منتجات العناية بالبشرة الجافة فوصف لي نوع من أنواع ماركة فليكستول وذهبت أنظر إلى رف الشركة ولفت نظري الرول هذا حبيت شكله وفكرته << والله من العجز يا عهود هههههه، المهم أخذته ورجعت البيت متحمسة استخدمه، حكيت أقدامي تكرمون بالمحك أو بردتهم ثم غسلتهم وجففتهم وحطيت من الكريم هو بشكل رول مثل الروج تمررينه دير ما دار على القدم وثم لبست الجوارب وتركته يمكن ساعتين ثم شفت النتيجة والله يا أنه فرق عن أول ما أقول لكم راحت لا الصدق تحسن فضيع كأول مرة وهذه النتيجة تقريبا بنسبة 50% لدرجة ما أخفيكم إني خفت شوي ورحت أقرأ مكوناته من ضمنها فازلين وزبدة الشيا وزيت جوز الهند وزيت زيتون، بس باقي فيني تخوف رحت أبحث في قوقل عن الشركة لقيت أنها طبية فارتحت الحمد لله وكملت استمريت إلى أن لقيت نتيجة ممتازة ورجعت أقدامي الحمدلله لطبيعتها، فحبيت أفيدكم ومن كثر ما أعجبني صرت أنصح اللي حولي فيه.

3-كريم هيل بالم من فليكستول

حبيت هذه الشركة طبية ونتائجها سريعة وفعلا ترطب، فبعد ما أنتهى الرول حبيت أجرب هذا جميل جدا وحبيت نتيجته، وهذا الشيء حمسني وشجعني أجرب باقي منتجاتهم وبإذن الله إذا جربت أوثق لكم تجرتي في تدويناتي القادمة، أعجبني أيضا أنه إذا وقفتي استخدام المنتج وحافظتي على الترطيب بأي مرطب ما ترجع أقدامك مثل قبل، لأن بعض المنتجات نتائجها وقتيه بمجرد ما نوقفها نرجع مثل قبل، وهذا الشيء حرصت انتبه له لأن كانت نتائجه سريعة ما شاء الله فقلت ممكن لو وقفت استخدامها ترجع مثل قبل واكتشفت أنه لا، فجدا جميل هذا المنتج.

4- جلسوليد

قديم جدا واعتقد الكل يعرفه حتى لو ما استخدمه ويمكن موجود بكل بيت، ملمسه يشبه الفازلين ثقيل لكن ما يدبق ويلصق في الملابس ويسبب ملمس مزعج لا بالعكس تمتصه البشرة بسرعة ويصير ملمس البشرة ناعم ومع الاستمرار يتوحد لونها، وشوي منه يكفي يرطب لك بشكل عميق، لليدين والقدمين عادي بأي وقت لكن لو حابين تستخدمونه للجسم عادي في فصل الشتاء أما بفصل الصيف فأنصحكم تخلطونه مع لوشن أفضل، رائحته تصنف أنها على مسك اللي يحبون المسك بتعجبهم وحتى لو ما أعجبتكم الرائحة أو ما تقبلتوها مثلا استخدموه لليدين والأقدام قبل النوم لأن نتيجته جدا جدا جميلة جد أنصحكم فيه بنات جربوه وأدعولي، بس انتبهوا إذا تتحسسون من الأشياء المعطرة لا تستخدمونه أو عندكم جروح أو حبوب لا تستخدمون أي شيء معطر أبدا الى أن تعالجونها، فيه البعض يضيف له ليمون وفيه البعض يضيف له زيت اللوز ويمدحون نتيجته ومن خططي القادمة بإذن الله أجربه مع زيت اللوز وراح أوثق لكم تجاربي بإذن الله، سمعت عن لوشن جلسوليد بس ما جربته لكن اعتقد أنه حلو << عهود إذا أعجبها شيء كل اللي من نفس الشركة حلو قاعدتي ههههه، جربوه بنات رائع جدا.

5-كيوفي 

  هل يخفى القمر! واضح لكم علاقتي الوطيدة فيه قاعد يلفظ أنفاسه الأخيرة هههههه، مرطب كيوفي يعتبر بالنسبة لي مرطب الوجه ومرطب الجسم ومرطب اليدين ومرطب القدمين بتاع كله، لازم يكون معي أحس بالأمان هههههه جديا ممتاز جدا، ويرطب بعمق على الرغم أن قوامه كريمي خفيف مو ثقيل لكن لما أرطب اقدامي به جدا ممتاز، والأجمل أنه طبي وما فيه رائحة للناس اللي ما يتقبلون بعض الروائح، مناسب للجفاف وفيه منه أنواع حسب نوع البشرة، سبب إني اشتريته لأول مرة كنت أبحث عن كريم بدون رائحة لأن مؤخرا مو أي رائحة كريم أتقبلها بالذات كريمات الوجه، فبحثت ولقيت كيوفي وأيضا طبي قلت خير على خير، فرحت الحمد لله أحس توفقت فيه ولي عليه سنين مفروض أغيره لكن للحين ما لقيت شيء مناسب للبشرة الحساسة وطبي وبدون رائحة إلى الآن جاري البحث، لكن ممتاز كيوفي ونقطة منه ترطب لك الوجه كامل ممتاز وفيه أحجام وعبوات اقتصادية إذا حابين تستخدمونه للجسم.

6- الجوارب

أو الشراريب اللي تسمونه، مهم جدا بنات حتى الأقدام تبقى ناعمة وبدون تشققات، وإذا عندك سيراميك ألبسيه وألبسي سليبر أو شبشب لأن ممكن لا سمح الله يزلق القدم فلازم سليبر، أما لو فيه سجاد فلازم الجوارب أفضل، صراحة لاحظت فرق، أحرصوا عليه والحين صار فيه أشكال وأنواع أضيفيه لتنسيقاتك ويعطي دلع وأنوثة.

هذه المنتجات اللي فادتني للعناية بالقدمين عناية بسيطة وسهلة ويومية، جربي منها اللي يناسبك، والأهم الاستمرار، ودائما وأبدا جربي منتجات لكن أهم شيء ما يكون عندك حساسية أوأي مشاكل جلدية بالأول عالجيها ثم جربي اللي حابه.

أتمنى إني أفدتكم ولو بشيء بسيط، إلى اللقاء في تدوينات أخرى بإذن الله.

  أستودعكم الله