منتجات ترطيب جربتها وأعجبتني

السلام عليكم ورحمة الله وبركاته

أهلين ، طابت أوقاتكم بالخير والمسرات

في البداية بقولكم السبب الأساسي اللي خلاني أتعرف على هذه المنتجات اللي تعتبر بدون عطور وبدون مواد تسبب تحسس وبعضها يعتبر منتج طبي ألا وهو الرائحة ، لأن ما كان يعجبني أي رائحة ولو مثلا بعضها تقبلتها مع الوقت تزعجني ، فبحثت في قوقل عن كريم مرطب بس بدون رائحة ، لا أخفيكم إني وأنا أبحث ما توقعت أحصل طلبي بس قلت بجرب وإلا طلع لي خيارات كثير وبحثت أكثر ووقع اختياري على كيو في كان أول كريم جربته بدون رائحة وإلى الآن استخدمه ونصحت فيه ناس كثير وأعجبهم ، ميزته أنه كمية قليلة منه ترطب ، وترطيبه عميق وخالي من الروائح ، وبعد ما جربت أكثر من منتج من كيو في حبيت أجرب من شركة ثانية لأن ما أفضل أثبت على منتج فترة طويلة لازم أغير ثم أرجع له ، فبحثت وجربت من شركات ثانية وكانت دائما خيارات ممتازة لأن مناسبة جدا للبشرة الحساسة والمعرضة للأكزيما فكانت خيار جيد جدا بالنسبة لي ، يلا نبدأ :

1- منتجات كيوفي

منتجات خالية من العطور والمهيجات وتحافظ على ترطيب البشرة ، ولها منتجات كثيرة ولها منتجات مخصصة حسب نوع البشرة ، وهناك منتجات تنسب جميع أنواع البشرات ، جربت بعض من منتجاتها وناسبتني بحكي لكم عنها :

1- الغسول 

الغسول سبب إني اشتريته هو إني في فترة من الفترات في فصل الشتاء جاني اكزيما في الوجه وبحكم إن الاكزيما لازم لها منتجات بدون عطور فما كان يصلح استخدم إلا غسول طبي خالي من الروائح فجربت كيوفي والحمد لله ناسبني فيعتبر خيار ممتاز لمثل حالة بشرتي .

2- اللوشن

أنا مو كثير صحبة مع اللوشنات إلا في حال كنت حابه استخدم اللوشنات المعطرة بين فترات متباعدة ، لكن كعناية بالجسم أفضل بدون رائحة وككريم عشان يكون الترطيب أعمق ، لكن في يوم جاني جفاف فكان يحتاج  ترطيب كثير أكثر من مرة في اليوم وكان فترة صيف فقلت اللوشن أسرع وأسهل وماكان جفاف شديد اللي مثل فترة الشتاء فجربته وكان خيار ممتاز لي لفترة الصيف.

3- سائل الاستحمام

بما إن بشرتي حساسة فأحيانا تتهيج الاكزيما ويحتاج مني أوقف أي منتج استخدمه وأبدأ بالمنتجات الطبية الخالية من العطور فجربت سائل الاستحمام من كيو في لأن ما فيه رائحة ويرطب وينظف بدون ما يجفف الجسم ، فحلو للي بشرتهم حساسة ومعرضة للاكزيما ، وعطروا الملابس ويكفي الأهم يكون الجسم نظيف والروائح استبدلوها رشوها في الملابس ، بكذا تضمنون نظافة ورائحة حل والأهم ترطيب بدون تحسس .

ولو تلاحظون الصور أنه نفسه هذا الغسول للوجه والجسم لأنه مخصص للبشرة بشكل عام بشرة الوجه والجسم خفيف وينظف ويرطب .

4- كريم الترطيب

كان أول منتج طبي وأول خيار استخدمه من منتجات كيوفي ومن بعده بدأت أجرب المنتجات الثانية ، له أحجام مختلفة وترطيبه ممتاز للوجه والجسم واليدين والأقدام ومع الاستمرار تبدأ البشرة تستعيد حيويتها ونضارتها ، مره ممتاز ترطيبه لجميع أنواع البشرة وبالذات للبشرات الحساسة والمعرضة للاكزيما ، جد أنصحكم تجربونه لو تدورون على كريم يرطب وبدون روائح وكميته حلوة .

5- مرطب الشفايف

طبعا بعد ما جربت كثير منتجات فكرت أجرب مرطب الشفايف وقرأت عنه أنه فيه نسبة حماية من أشعة الشمس وأيضا الحلو فيه أنه شفاف ويرطب وما يسبب مضايقة ملمسه على الشفايف ، ويجلس معكم فترة طويلة لأن نقطة منه تكفي ، ممتاز جدا .

2- مرطب الشفايف من سيتافيل

 خلص من عندي وحاليا استخدم كيوفي ، مرة استخدم سيتافيل ومرة كيوفي ، ميزته شفاف وفيه نسبة حماية من أشعة الشمس وكميته كبيرة لأن شوي منه يكفي يرطب ، وفيه رائحة خفيفة جدا لكن حلوة ، عموما أحب هالإثنين وناسبوني كثير وأنصحكم فيهم لمزاياهم اللي ذكرت .

3- مرطب الأقدام هيل ماجيك من فليكيستول 

سبق وتكلمت عنه في تدويناتي السابقة بس بقول لكم ع السريع أنه حطيته بهذا الموضوع لأن يوم اشتريته وجربته كان مفعوله سريع فخوفني هذا الشيء لكن يوم بحثت وجدت أنه منتج طبي فهذ الشيء ريحني وحبيت أفيدكم اللي عندها تشققات هذا المنقذ السريع .

هذه منتجات ترطيب جربتها وأعجبتني وبحكم الآن فصل الشتاء وتجف البشرة فمهم الترطيب والأفضل منتجات ما تكون معطرة عشان مع الجفاف وعطور ممكن تسبب تحسس وحكة ، جربوا منها اللي حابين ممكن تناسبكم وتصير من مفضلاتكم .

اتمنى أنكم استمتعتوا معي وأفدتكم و لو بشيء بسيط .

إلى اللقاء في تدوينات أخرى بإذن الله ، أستودعكم الله.