ايش موجود في شنطتي ؟

السلام عليكم ورحمة الله وبركاته 

أهلين ، طابت أوقاتكم بالخير والمسرات 

هالمرة تدوينتي ممتعة غير شكل غير عن نمط التدوينات اللي سبق وكتبتها ، وكنت وما زلت أحب أتابع مثل هالمواضيع في اليوتيوب ممتعة وممكن تلهمني شيء ممكن استفيد منها ، وحلو أتابع الناس وأتعرف على اهتمامات متنوعة ، فحبيت إني أتكلم عن هالموضوع اللي يمكن قليل في عالمنا عالم البلوقرز أو المدونين ، يلا نبدأ :

هذي صورة شاملة بحكي لكم بالتفصيل :

1- الشنطة

أنوع في الشنط لكن الفترة الأخيرة اعتمدت هذي ليش ؟ لأن مع فترة كورونا قللت خروجي كثير وإذا خرجت أخذتها وبعد ما أرجع أرش عليها معقم من باب الاحتياط لأن وأنا خارجة أكيد ألمس أشياء مختلفة وألمسها فمع المعقم ما شاء الله ما تغير ملمسها ولا لونها لأنه أملس وجودتها كذلك ممتازة ، أخذتها من كم سنة بس ما كنت استخدمها كثير لكن مع هالفترة ناسبت الوضع وسهلة التعقيم ، وحجمها مناسب متوسط لخرجة سريعة ، من محل اسمه موا MOA ، هذا محل كان موجود في غرناطة مول بالرياض بس ما أدري إذا باقي هالمحل أو لا وهل له فروع أو لا ، عالعموم جودته ممتازة وتصاميمه وألوانه غريبة ومميزة .

2- البوك ، شباصة

البوك أكيد مهم يلم المبلغ اللي معك والبطايق ، عاد الأبواك كثير أحبها أحب أنوع فيها وأحيانا أطقم مع الشنطة ، هذا آخر شيء اشتريته من رد تاغ مرة أعجبني حسيته أنيق والألوان متناسقة وعملية وهادية و مو كبير وهذا أهم شيء ، والأسود اللي بالصورة هذي شباصة صورتها مع البوك ما تسوى صورة لحالها شكلها غلط وهي لوحدها😂 ، المهم أحب أخذ معي شباصة احتياط شيء ألم شعري به لو اللي لابستها إذا ربطة لو انقطعت أو إذا شباصة لو انكسرت يكون عندي بديل لأن ما أحب الشعر مهما كان طوله يكون مفلول تحت الطرحة والعباية ملمسة يضايق الأفضل ينلم تماما وأخذت هذي صغيرة ماودي تأخذ حيز كبير في الشنطة .

3- مناديل

المناديل مهمة لأي أحد شيء انكب أو توسخت اليد لأي سبب أحيانا ما يكون بالمكان اللي الشخص فيه مناديل فوهقة ، ومع زمن كورونا الأفضل أغراضك كلها معك ما تتشارك مع الأخرين حتى المنديل ، فهذا حلو وصغير حجمه وفيه كثير أخذت مجموعة من محل كوري طولت معي مرة حلوة وعملية وسعرها ممتاز .

4- المعقم

أعتقد صار صديق الكل هالفترة مهم جدا يكون معكم في الخروج ، وتدرون إني ماشاء الله علي من زمان ما يفارق شنطتي 😎 من قبل زمن كورونا كان معي دايم لأن نمسك شغلات كثير فمهم تواجده .

5- كريم مرطب ، روج ، مراية

هذي الثلاث أشياء أخذها احتياطا لو مثلا قابلت وحده أعرفها أو أقارب بالصدفة يمكن أغلبنا قد صار معه هذا الموقف ، فيكون عندي هذي الأشياء تصير مثل طوارئ سريعة ، والروج لونه طبيعي ما بين الوردي والنود .

6-نوتة ، قلم

أحب أخذ معي نوتة وقلم من زمان أحيانا أحتاج أكتب شيء أو أكتب معي الأشياء اللي أحتاج أشتريها ، وبعد ما دخلت عالم التدوين صرت أخذها معي إذا جاء ببالي فكرة لموضوع أسجلها عشان ما أنساها .

7- الكمامة

ألبس وحدة ووحدة احتياط  لو انقطعت حقتي أو توسخت ، أو ممكن أحد حولي يحتاجها ، عموما مهمة ومن بعد كورونا حسيت إنها مهمة جدا ودايم للوقاية بإذن الله من أي عدوى مو بس كورونا .

8- سجادة الصلاة 

ماعندي صورتها حاليا وأنا أصور الشنطة كنت طلعت السجاد أغسلها وتو تذكرتها و أنا أكتب ، لكن أكيد تعرفونها وتلاقونها بمحلات الكماليات  اللي بحجم الكف حلوة تكون معكم بنات وتكون في سيارة الرجال إذا أحد برا وجاء وقت الصلاة تفرشونها وتصلون ومع كورونا برضوه أكثر أمان من مشاركة السجادة مع أحد .

بس انتهت تدوينتي هذي الأشياء الأساسية لشنطة خروج ، استمتعت وأنا أسوي هالتدوينة أحب هالنوع من المواضيع ، أتمنى إنكم استمتعتوا معي وأفدتكم ولو بشيء بسيط ،

إلى اللقاء في تدوينات أخرى بإذن الله ، أستودعكم الله .