مشترياتي من موقع شي إن 

السلام عليكم ورحمة الله وبركاته

أهلين ، طابت أوقاتكم بالخير والمسرات 

الفترة الأخيرة الأغلب أشوفه يطلب من شي إن بكل مكان اسمعه ما شاء الله فقلت بدخل التطبيق وأشوف ، مع إني سبق وطلبت قبل يمكن ثلاث سنوات أشياء منوعة مو ملابس كماليات يعني بس وقتها ما كان بشهرته الحين ، فدخلت التطبيق وكنت احتاج كم شغلة في بالي ودورت وقرأت التعليقات كانت مشجعة وكان السعر مناسب لي وأيضا التقييمات للمنتج عالية فطلبت لي كم شغلة احتاجها ، بقول لكم بعض المنتجات اللي اشتريتها وانطباعي الأول عنها ورأيي ، بقسمها قسمين شتوية ومتنوعة ، يلا نبدأ :

- مشترياتي الشتوية :

-جاكيت شتوي

كنت احتاج جاكيت ألبسه في البيت بحكم إني البس لبس متوسط مو ثقيل ولا خفيف وفي الشتاء أوقات يجي أيام برد و أيام تكون دافية ، وأحيانا بنفس اليوم مرات يكون مره برد ومرات يكون الجو دافي ، فكنت أبغى جاكيت صوف وسط مو مره ثقيل ولا خفيف يعني مناسب لغرضي ، وبحثت ولقيت هذا أعجبني وأخذت أكبر من قياساتي بشوي حابه يجي واسع عشان لو لبست تحته شيء يكون مضبوط وما يجي ضيق وتتمطط خيوطه ، أبغاه مبحبح يعني ، والحمد لله أعجبني .

- قبع وغطاء رقبة

هذا أكثر شيء كنت متحمسة له ، أعجبتني فكرته مره وشوفوا كيف من داخل فرو يدفي حتى داخل حق الرقبة فيه الفرو ، على فكرة وأنا اكتب هالكلام لابسته ، وبرضوه يغطي الخشم إذا رفعتوه زيادة لفوق ، وهذي معاناتي ومعاناة كثير أكيد مثلي يثلج الخشم وهذا أفضل حل مره حلو ، فيه ألوان اخترت هذا حسيت محايد وعملي مع أي لبس .

- قفاز صوف

اشتريته لأني حبيته حسيته أنيق ولونه جدا أعجبني ، لكن يوم لبسته أعجبني والله يدفي نوعا ما بحكم إني داخل البيت وجميل على اليد ، في ألوان لكن هذا جميل وعملي .

- مشترياتي المتنوعة :

- قفاز التل 

من فترة هابين فيه البنات أشوفه بكل مكان وأنا مو كل هبة أهب فيها مو كل شيء يعجبني لكن هذا أعجبني صراحة أنيق جدا وشفت سعره حلو و أخذته ، مره حلو للوكات منوعة بس غسلته وقسته حلو مو ضيق ولا واسع حلو مره ، باقي ما استخدمته لكن حبيته .

- ربطة شعر

فكرتها غريبة عن نفسي ما أعرفها قد شفت تشبهها لكن ما جربتها للآن ، جودتها وصلتني حلوة وغسلتها وبرضوه ما شاء الله ما تأثرت لا ألوانها ولا الحديدة اللي داخلها ، مقارنة بسعرها وكان عليها خصم أشوفها ممتازة .

- كوب خشب

ترددت اطلبه ما أدري عن جودته لكن مره كان خاطري فيه أسوي فيه كورتادو فقرأت التعليقات كانوا يمدحونه البنات وتوكلت على الله و أخذته بالرغم سعره كان متوسط ، لكن يوم وصلني جودته حلوة وثقيل ومو خشن بالعكس مرة حلو ، لكن حقيقة باقي ما استخدمته ، لكن يكفي شكله مرة حلو كثير عاجبني .

- كفر أيباد

من فترة أدور كفر لأيبادي أنا مرة أحرص على الكفرات تحافظ على الأجهزة ، لكن ما لقيت للأيباد وقد سبق وطلبت وطلع خطأ المقاس ، طلع فيه أحجام من إصدارات تشبه رقم إصدار جهازي ، ويوم لقيت في شي إن فرحت والأشكال كل واحد يقول الزين عندي لكن خايفة من المقاس ، وطلع فيه القياسات بالسانتي مره حبيت هالنقطة والدقة في الموقع والحمد لله فادتني كثير ، أخذت المتر وقست والحمد لله توفقت وجودته ممتازة ، وقوي مو سليكون لا يعتبر بلاستيك قوي .

- كفر جوال 

اشتريت مجموعة كفرات لأني مثل ما قلت لكم قد سبق قبل حوالي ثلاث سنين طلبت كم غرض منوع وكان من ضمنها كفرات جوال وأعجبتني وعملية حقت كرف ، وهذي المرة طلبت كم واحد تقعد معي مدة وأغير و أنوع فيهم و أسعارهم مناسبة جدا وجودتها ممتازة بالنسبة لي أول واحد هذا

قد اشتريت أول مثله لجهازي الأول بس لون ثاني ما أدري مثله بالضبط أو يشبهه ، عموما مره قريب من شكله كان عملي وخدم معي سنين ما شاء الله ما انقطع ، يعتبر سيلكون بس قوي حبيته مره وفيه ألوان أخذت غامق يكون عملي .

الثاني هذا 

عنابي على توتي درجة تجنن فخمة ويعتبر سيلكون قوي شوي بس حبيت اللون بشكل .

الثالث هذا

هبة المسكة أعجبتني وهو مثل ما تشوفون سيلكون وقوي شوي ، و أعجبني أكثر الألوان اخترت المسكة كحلي نفس لون جهازي والأطراف حقت أزرار الصوت وقفل الجهاز تختلف فيه ألوان اخترت برتقالي فاقع مرة حلو مكس الألوان .

آخر واحد 

هذا تجي معه مسكته ، الألوان مو ذوقي كثير لكن حبيت أغير و أطلع من دائرتي المعتادة في الألوان ، حبيت التغيير و يغير في النفسية لما تجددون الأشياء من حولكم ، جاي بلاستيك قوي خامته .

وكان فيه واحد سيلكون فوشي سادة ما صورته كنت ملبسته الجوال وقت أصور ، عموما جودة كفراتهم بطلة وأسعارها رهيبة .

بس هذي كانت جولة سريعة لبعض مشترياتي من شي إن ، إذا حابين تطلبون خلوا معكم متر وقيسوا علشان تجي طلباتكم مضبوطة لأن مرة أشكرهم على نقطة الدقة في القياس تطلبين وأنتي مرتاحة ، والله يجزاهم خير اللي في التعليقات ويكتب أجرهم فادتني تعليقاتهم أعطتني فكرة عن المنتج ، حتى قلت إن شاء الله إذا وصلت منتجاتي أكتب تقييمي أفيد الناس مثل ما استفدت ، طلبتي وصلتني خلال أسبوعين وسليمة الحمد لله كلها تمام وبحالة ممتازة .

أتمنى إني أفدتكم ولو بشيء بسيط ، وإلى اللقاء في تدوينات أخرى بإذن الله .

أستودعكم الله .