وصفة كيكة سهلة ولذيذة

السلام عليكم ورحمة الله وبركاته

أهلين بنات

اليوم تدوينتي غير شكل😁 من المطبخ جايبة لكم اليوم وصفة لذيذة لكيكة هشة وسهلة وبإمكانكم بهذه المقادير بتغيير بسيط تطلعون أنواع كيك كثيرة 👌، هذا من غير ابداعكم في التزيين تقدرون تسوون منها كيكة سهلة ولذيذة وتجملكم قدام ضيوفكم ، طبعا هذه الكيكة اسمها كيكة عهود في البيت 😎 ، خلاص ثبتت باسمي بحكم إنها بطريقتي واعتمدت ، طبعا بنات الكيك تتشابه مكوناته كثير لكن باختلاف الكميات وبعض الإضافات والا الفكرة غالبا وحدة ، أنا في بداياتي يا ما سويت كيك بس للأسف ما يضبط وكنت أحاول وأحاول إلى ما أن ما شاء الله صار يضبط معي ، حابة أقول لكم معلومة بسيطة للي في بداياتهم يتعلمون أو اللي باقي ما ضبط معهم الكيك استخدموا صينية البايركس عشان تقدرون تشوفون تحميرها زين وهذه نقطة مهمة تساعدكم إلى ما تتمكنون وتعرفون بعدها أبدأوا استخدموا صواني التيفال اللي طبعا ألذ فيها الكيك لأن البايركس للحلا البارد ممتازة .

طيب هذه الكيكة بكتب لكم مقاديرها الحين جربوها سهلة ولذيذة ، يلا نبدأ :

هذه صورتها حطيت على وحد شوكولاتة ووحده لا ، بكتب لكم طريقتها بالتفصيل :

المقادير /

- كأس دقيق

- كأس لبن

- ثلاث أرباع كأس سكر

- ثلث كأس زيت

- بيضتين ، وإذا البيض صغار نحط ثلاثة

- ملعقة صغيرة فانيلا

- ملعقة كبيرة باكينج بودر

  الطريقة /

أول شيء نخفق البيض مع الفانيلا يدويا بالمضراب هذا اللي أسوي أو إذا حابة بالكهربائي أو بالخلاط اللي يريحك كلها حلوة ، بعدها نوقف ونضيف السكر ونرجع نخفق شويات ، ثم أضيف الزيت واللبن وارجع أحرك ثم في زبدية أو طاسة نكون حاطين الدقيق وملعقة الباكينج بودر ونحركها بملعقة تتجانس مع بعض ثم نضيفها على الخليط ونحرك بالمضرب اليدوي الى أن تتجانس ثم أروح أشغل الفرن من تحت درجة متوسطة أنا لأن استخدم الخبازة اللي دائرية فاضغط على زر التشغيل من الأسفل وأرجع أخذ الصينية الوسط سواء بايركس أو تيفال ونمسحها بزيت ونذر دقيق رشه بسيطة ونكب الخليط ونحطه في الفرن ثم نتركه ما بقول وقت معين لا خليك حولها لكن أول خمس دقائق لا تفتحين الفرن وبعدها صيري شيكي كل شوي أنا أتركها خمس دقائق ثم أشوف وشويات كذا وأشوف لأن من فرن لفرن تختلف درجة الحرارة وبعدها بيبدأ لونها يصير بني فاتح ومن فوق تلاحظين بدأت تنشف هنا ولعي الفرن من فوق واتركيها شوي مثلا ثلاث دقايق ثم طفي من تحت وأتركيها تتحمر من فوق الى أن تصلين للون اللي حابه أنا أفضل الذهبي لكن فيه البعض يحبها فاتحة عموما خذي عود أسنان ودخليه خلالها وشوفي يطلع ناشف معناها نضجت طلعيها واتركيها عشر دقائق كذا مكشوفة تفتر ثم غطيها ، وبس واستمتعي بألذ كيكة .

طبعا الكأس أنا استخدمت اللي مثل هذا 👇

اعتقد موجود بكل بيت ومتوفر بسهولة ، والملعقة الصغيرة حقت الفانيلا أقصد الحجم الصغير مو حقت الشاهي لا اللي نقدر نقول عنها وسط بين الحجم الكبير حق الأكل وبين الحجم الصغير حق الشاهي .

طبعا مثل ما قلت لكم تقدرون تغيرون وتعدلون عليها بالإضافات اللي حابين وتطلعون كيكة ثانية ، مثلا بدل اللبن تقدرون تحطون كأس عصير تمر مع رشة قرفة أو كأس عصير برتقال مع شوي بشر قشر البرتقال أو كأس حليب سائل مع رشة نسكافية ، كثير خيارات تبدعون فيها ، وممكن تغيرون شكل الصينية وتقلبونها وتزينونها بتمر أو رشة مكسرات مشكلة أو خليط النستلة والكيري، أو تقدرون مثل ما سويت بالصورة تحطون شوكولاتة بودرة بحيث تحطون الخليط في الصينية وتبقون شوي منه تخلطون معه ملعقة صغيرة شوكولاتة بودرة وتخططون على الكيكة بشكل عشوائي تطلع لكم أحلى ماربل كيك .

شوفوا كيف شكلها هشة 

طبعا أنا تكلمت بالتفصيل حابه الكل يستفيد اللي مبتدئة واللي مثلي ما كان يضبط معي وصار ماشاء الله مضبوط ، واللي تعرف تجرب طريقتي وتعتمد الكيكة العهدونية 😁 .

اتمنى انكم استمتعوا معي وأفدتكم ولو بشي بسيط ، إلى اللقاء في تدوينات أخرى بإذن الله .

أستودعكم الله👋❤