يوم من حياتي

السلام عليكم ورحمة الله وبركاته

أهلين ، طابت أوقاتكم بالخير والمسرات

من فترة أفكر أكتب تدوينة تشبه الفلوق ، كثير أحب أتابع فلوقات باليوتيوب ، وقلت ليش ما أسويها تصير فلوق مكتوب بدل ما هو مرئي يعني تنويع وفي مجال اختصاصي كمدونة شخصية و تنويع في المواضيع ، الفلوقات يمكن البعض ما يفضلها ويشوفها مالها فايدة لكن من وجهة نظري أشوف إنها ممتعة في المشاهدة أو الآن في القراءة ويتخللها مواقف ممكن تلهمنا شيء ، يلا نبدأ اليوم  /

صحيت اليوم بعد الظهر وكان وقت الغداء فما عاد يمديني أفطر بحكم أن بعض الأكل ما يصلح يتسخن ينشف ، فقلت أجل بأخذ لي قهوة عربية مع حبتين تمر ( القهوة على الريق ما أنصحكم بها أنا أقلل قدر الإمكان أنها تكون على الريق وإذا شربتها أكل معها أي شيء ) وبعدها بوقت أتغدى ، غداي كان ساندوتشات بالدجاج المشوي متبلة وصوص طحينة وشاي 

بعدها كنت حابة أروح السوق عاد من زمان ما رحت ، أنا مو كثير صحبة مع المولات ما أحب أمشي كثير ، أحب أروح اشتري الشيء اللي أحتاجه وأطلع بسرعة ، حتى كنت أتمنى زمان فيه مواقع توصل وما أروح من غير شر ، ففي الفترة الأخيرة  صرت أطلب اللي أحتاج من النت وارتحت ، لكن اليوم حبيت أروح ما بطول باشتري كم شغلة أحتاج أشوفها بنفسي قبل زي العطور والأرواج والمكياج بشكل عام وقلت بالمرة أغير جو شويات ، كنت حابه أصور لكم مقتطفات كجولة في المول بس كنت مستعجلة وحابة أخذ اللي أحتاج وأرجع حتى إني كتبتها عشان ما أنساها ، بوريكم مشترياتي 

- روج وقلوس

مكياجي شهادتي فيهم مجروحة بتقولون لي ليش؟ لأن سلمكم الله في يوم من الأيام جاتني اكزيما في شفايفي وطبعا الاكزيما اللي يعرفها تسبب احمرار في المكان ثم تجففه ويغمق لونه وكان عندي مناسبات وقتها فكان لازم الاقي لي حل يغطي آثار الاكزيما اللي في شفايفي ويعطيها منظر مقبول الى أن تخف وتتحسن ، وجربت كذا شركة تسبب لها حرارة وحكة وتهيج الاكزيما زيادة وتعبت وأنا أجرب في الأرواج إلى أن وجدت كذا ماركة ممتازة ما تأثر على شفايفي إذا حطيتها أبدا مجرد لون وهذا المطلوب وكان من ضمنها مكياجي ومن ذاك اليوم اعتمدتها وأدعي للي دلتني عليها ، طبعا اليوم كل ما اخترت لون لقيته مخلص كان قصدي أخذ اثنين لكن ا لقيت ملقيت و استقريت على لون الروج هذا لونة حلو وعملي يعني ما بين الوردي الغامق على نود غامق على موف لون حلو ومميز وعملي وأحب يكون دايم معي أساسي يليق على أي لبس ، مو أول مرة أخذ هذا الروج من عندهم مرة جميل ويطول معاك ومو مطفي ولا يلمع متوسط مابين وبين وكمان مو من أول فنجان وانتي تشربين يروح لا يثبت شويات ، أما القلوس كان خاطري فيه وبصراحة أول مرة أجرب من عندهم القلوسات الألوان كانت خمسة أو ستة ما أذكر يعني مو خيارات كثيرة لكن كلها أعجبتني ألوان عملية تناسب أي لبس ، عموما بعضها مخلص فأخذت هذي الدرجة تشبه الروج .

-كريم اليد باللوز ، مقشر شفايف

دخلت ذا بودي شوب وقصدي بأخذ المقشر سمعت عليه مدح مو من قريب لا والله من زمان كثير يمدحونه وترددت كذا مرة أخذه وأحيانا أنسى ، عموما شفت عليه عرض وقلت أجل بأجربه بالذات مع الشتاء كل شيء يجف ويتقشر .

أما الكريم هذا من زمان جربته هو ترطيبه حلو وريحته حلوة وفواحة أحب استخدمه زمان في العزايم تصير ريحة اليد حلوة ويرطب ، برضوه عليه عرض الكريم .

- مناكير (طلاء أظافر) 

 سمعت الفترة الأخيرة كثير يقولون فيه مناكير تتقشر في المحلات اليابانية والكورية ، فاليوم وأنا أمشي لقيت محل زي هذي المحلات وشفت المناكير قدامي سألت الموظفة ودلتني عليها واحترت في الألوان بعدين قلت بأخذ واحد أجرب ، لأن أحيانا نفكر الشيء بيعجبنا ونكثر منه وهو تجربة وبعدين يمكن ما يعجبنا أو ما يناسبنا ويكون خسرنا على الفاضي ، فأخذت ثلاثة ثم و أنا أحاسب تذكرت هذه القاعدة ورجعتها وبقيت واحد ، قلت أجرب وأشوف ، المناكير بشكل عام مو مرة أكثر منها نادرا أحط لكن يوم سمعت باللي يتقشر قلت حلو أحطه ساعة ساعتين أحيانا تغيير وأقشره ، فبشوف كيف جودته إن شاء الله يكون حلو .

بعدها طلعت من المول وكان برررد مرة وأنا أمشي شفت ملاهي على الطريق يالله جاني شعور غريب وأنا أتفرج فيها كنا نفرح فيها وأحنا أطفال أحب هذا النوع من الألعاب حتى الحين وأنا كبيرة اللي مراجيح وزحليقات مرة تعجبني وممتعة .

وعلى الطري قعدت أفكر وش أتعشى و إحترت لكن استقريت على هرفي ، وجبتي المعتادة تورتيلا ، ورجعت البيت وحطيت مشترياتي على جنب وغسلت يديني بموية وصابون وجهزت العشاء حقي 

بعد ما تعشيت الحمدلله ،عقمت مشترياتي علشان استخدمها و صورتها علشان أنزلها هنا. 

بروح أسوي لي شاهي ثم أكمل 

رجعت 😁ولبست جاكيتي بارد الجو مرة اللحين الساعة 1 ونص الليل يشتد البرد ، عموما هذا كان يومي أقدر أقول انتهى ، بأكمل أشرب الشاهي حقي وأكمل أنزل التدوينة ، أتمنى إنكم استمتعتوا معي وأفدتكم ولو بشيء بسيط ، إلى اللقاء في تدوينات أخرى بإذن الله ، أستودعكم الله .