فطاير على الصاج سهلة ولذيذة

السلام عليكم ورحمة الله وبركاته

أهلين ، طابت أوقاتكم بالخير والمسرات

قبل كم يوم جاء على بالي فطاير على الصاج ، أنا مو كثير صحبة مع عمل الفطاير بالرغم إني أحبها كثير بس أستصعبها نوعا ما ، فقلت بسوي على الصاج ظنا مني إنها أسهل ، فوفقت فيها ( أخذتها من قناة اسمها مطبخ هند ) كنت ابحث وأعجبتني الطريقة سهلة وقلت أجربها أعجبتني راح أعتمدها ما أعجبتني أجرب غيرها ، لكن جربتها و اعتمدتها  ، أعجبتني وطلعت لذيذة أخذت مني ساعتين بالضبط من بدأت أعجنها إلى أن حمرتها ، حلوة كعشاء خفيف ولذيذ ، وحلوة كفكرة للفطور للتنويع ، يلا نبدأ الطريقة :

المقادير /

نص كوب ماء دافئ 

ربع كوب زيت

ربع كوب لبن 

ملعقة كبيرة خميرة

ملعقة كبيرة حليب بودرة

ملعقة سكر 

نعجن هذه المكونات ثم نضيف 

كوبين ونص دقيق

نص ملعقة كبيرة باكينج بودر

ربع ملعقة ملح ( هي نص بس أنا قللت حطيت ربع وأعجبتني )

( الكوب اللي استخدمته نفسه الكوب اللي استخدمت في الكيكة شوفوها بأحد تدويناتي السابقة ) 

الطريقة /

نعجن باليد ثم نغطي عليها ونتركها ساعة 

خلال هذه الساعة جهزوا الحشوات اللي تبغون إذا دجاج أو خضار أو بيض مسلوق اللي تبغون ، أنا لأني سويتها عشاء وكنت ناوية أحشيها أشياء خفيفة مثل لبنة وجبنة وزعتر ، فما جهزت شيء خلال هالفترة غسلت المواعين وقتها وجهزت المكان اللي بفرد فيه والفرادة وجهزت الصاج كلها جاهزة عشان أنجز وما أحتاس  زي ما أنتم شايفين كلش جاهز ( الصورة هنا في نص الشغل لأني نسيت أصور من البداية وأنا أسوي شفتها أعجبتني أول كم فطيرة قلت ليش ما أنزلها في مدونتي سهلة ولذيذة )

وبعد ما مر الوقت وخلصت الساعة أفتح عليها وأعجنها بيدي تتجانس وتلتم مع بعض بعد ما خمرت وأقسمها إلى كور متوسطة صاحبة الفديو قالت تجي 12 كورة لكن قلت يمكن كأسها غير كأسي أصغر أو أكبر لكن وأنا أقسم طلعت معي 12 برضوه فتمام ماشين مضبوط أجل الحمدلله ، زي ما تشوفون هنا حجمها متوسط 

بعد ما تكورون العجينة كلها غطوا عليها وخلوها ترتاح وجهزوا الحشوات ، أنا اخترت 

- زيت زيتون وزعتر تخلطونهم بكميات متساوية مثلا ملعقة زعتر وملعقة زيت زيتون بس حطوا الكمية اللي تبغون.

- جبنة كرافت شيدر اللي علبة معدن زرقاء مبشورة .

- جبنة سائلة أي نوع .

- لبنة.

زي ما تشوفون حشواتي سهلة بس حطيت لي في صحن الزعتر وزيت الزيتون والجبنة بشرتها أما اللبنة والجبنة أخذ من العلب على طول .

حميت الصاج ورشت موية إذا نشفت بسرعة معناها صار حامي وأفردها ثم انقلها بيدي على الصاج

 وأتركها تتحمر شوي من تحت ( غضوا الطرف عن الشكل المنعوج 😂 اعتبروه دائري ) بس غالبا بيطلع مو مضبوط تماما لأني نقلتها من مكان الفرد إلى الصاج بس مقبول شكله لا بأس ، شوفوا هنا في هذه الصورة حرصت أصور لكم أنكم ما تحمرونه كثير يصير بهذا الشكل كأنه بدأ يتحمر

وأقلبوها وحطوا الحشوة على السريع ثم اثنوه واضغطوا بشويش علشان ينقفل على الحشوة تلتصق اطراف الفطيرة مع بعض وفي هالأثناء إحنا نحط الحشوة وإحنا نثني الفطيرة بيتحمر من تحت ، خلوا شغلكم على نار منخفظة وخلوكم سريعين ورى بعض تحطون وحدة تتحمر من تحت وهي تتحمر بسرعة افردوا كرة ثانية واحشوها وهكذا ما تأخذ وقت تتحمر بسرعة ، والجبنة السائلة انتبهوا تطولون تحمرونها لأنها تسيح بسرعة ، والشيدر برضوه ، وأنتوا تحمرون حطوها بصحن زي السعف أفضل إذا تعرفونها وحطوا تحتها الورق الأبيض م أعرف اسمه اللي نغلف به الساندوتشات وغطوا عليها عشان ما تنشف وإذا ما عندكم عادي بأي علبة بس لا تغطونها تماما لا أتركوا الغطاء شوي مفتوح علشان ما ترشح مع الحرارة ، هذا شكلها النهائي

 وبس جربوها مع كاسة شاي أو عصير اللي حابين و بالهنا والعافية .

انتهت تدوينتي اللذيذة أتمنى إني أفدتكم ولو بشيء بسيط وتجربونها وتعجبكم ، إلى اللقاء في تدوينات أخرى بإذن الله ، أستودعكم الله .